सोलापूर- प्रतिनिधी : ग्रामीण विकासाला नवी दिशा देत गावांच्या सर्वांगीण प्रगतीचा संकल्प प्रत्यक्षात उतरविण्यासाठी मुख्यमंत्री समृद्ध पंचायतराज अभियान सोलापूर जिल्ह्यात प्रभावीपणे राबविण्याच्या दृष्टीने जिल्हा परिषद प्रशासनाने जोरदार तयारी सुरू केली आहे. ग्रामविकास मंत्री तथा सोलापूर जिल्ह्याचे पालकमंत्री जयकुमार गोरे यांच्या मार्गदर्शनाखाली हे अभियान यशस्वी करण्यासाठी जिल्ह्यातील सर्व विभागांनी समन्वयाने, एकजुटीने आणि नियोजनबद्ध पद्धतीने काम करावे, असे आवाहन जिल्हा परिषदेचे मुख्य कार्यकारी अधिकारी कुशल जैन यांनी केले.
मुख्यमंत्री समृद्ध पंचायतराज अभियानाच्या प्रभावी अंमलबजावणीसाठी मुख्य कार्यकारी अधिकारी कुशल जैन यांच्या अध्यक्षतेखाली जिल्हास्तरीय आढावा बैठक आयोजित करण्यात आली होती. या बैठकीस उपमुख्य कार्यकारी अधिकारी (प्रशासन) सूर्यकांत भुजबळ यांची प्रमुख उपस्थिती होती. यावेळी जिल्ह्यातील विविध तालुक्यांमध्ये अभियानाच्या अंमलबजावणीसाठी सुरू असलेल्या कामांचा सविस्तर आढावा घेण्यात आला.
गावनिहाय आढावा अन् सूक्ष्म नियोजनावर विशेष भर
या बैठकीत जिल्ह्यातील प्रत्येक तालुक्यातील गावनिहाय अभियानाच्या प्रगतीचा सविस्तर आढावा घेण्यात आला. केवळ कागदोपत्री नियोजन न करता प्रत्येक गावाची प्रत्यक्ष परिस्थिती, उपलब्ध सुविधा, विकासकामांची सद्यस्थिती आणि आवश्यक बाबी लक्षात घेऊन सूक्ष्म नियोजन करण्यावर मुख्य कार्यकारी अधिकारी कुशल जैन यांनी विशेष भर दिला.
अभियानाची निर्धारित उद्दिष्टे वेळेत पूर्ण करण्यासाठी प्रत्येक तालुक्याने स्वतंत्र कृती आराखडा तयार करावा. या आराखड्यानुसार कामांचे प्राधान्यक्रम निश्चित करून त्यांची प्रभावी अंमलबजावणी करावी, अशा स्पष्ट सूचना त्यांनी संबंधित अधिकाऱ्यांना दिल्या.
प्रलंबित कामांना गती देण्याचे निर्देश
अभियानांतर्गत प्रत्येक गावातील सुरू असलेली कामे, प्रलंबित बाबी, उद्दिष्टपूर्तीची सद्यस्थिती आणि आवश्यक उपाययोजना यांचा बैठकीत सखोल आढावा घेण्यात आला. प्रलंबित कामे विनाविलंब मार्गी लावण्यासाठी संबंधित विभागांनी विशेष लक्ष द्यावे आणि कामांच्या प्रगतीचा नियमित आढावा घ्यावा, असे निर्देश यावेळी देण्यात आले.
विविध विभागांनी स्वतंत्रपणे काम करण्याऐवजी परस्पर समन्वय राखून एकत्रितपणे काम केल्यास अभियानाची उद्दिष्टे अधिक प्रभावीपणे साध्य करता येतील, असे मुख्य कार्यकारी अधिकारी कुशल जैन यांनी स्पष्ट केले. अभियानाच्या यशस्वी अंमलबजावणीसाठी प्रत्येक विभागाची भूमिका महत्त्वाची असून, सर्व अधिकारी व कर्मचाऱ्यांनी जबाबदारीने काम करणे आवश्यक असल्याचेही त्यांनी नमूद केले.
ग्रामीण विकासाला गती देण्यासाठी प्रशासनाचा कृतीशील पुढाकार
ग्रामीण भागातील विकासकामांना गती देणे, ग्रामपातळीवरील नियोजन अधिक सक्षम करणे, उपलब्ध साधनसंपत्तीचा योग्य वापर करणे आणि अभियानातील प्रत्येक घटक निर्धारित कालावधीत पूर्ण करणे, यासाठी प्रशासनाने कृतीशील भूमिका घ्यावी, असे आवाहन बैठकीत करण्यात आले.
गावांच्या सर्वांगीण विकासासाठी लोकसहभाग, विभागीय समन्वय आणि प्रभावी अंमलबजावणी यांना महत्त्व देत प्रत्येक तालुक्याने अभियानाकडे प्राधान्याने लक्ष द्यावे, अशी अपेक्षाही यावेळी व्यक्त करण्यात आली.
या बैठकीस जिल्ह्यातील सर्व तालुक्यांचे गटविकास अधिकारी तसेच जिल्हा परिषदेचे सर्व विभागप्रमुख उपस्थित होते.
एकजुटीच्या नियोजनातून समृद्ध गावांचा संकल्प!
मुख्यमंत्री समृद्ध पंचायतराज अभियानाच्या माध्यमातून ग्रामीण भागातील विकासाला नवी दिशा देण्याचा जिल्हा परिषद प्रशासनाचा प्रयत्न आहे. पालकमंत्री जयकुमार गोरे यांच्या मार्गदर्शनाखाली आणि मुख्य कार्यकारी अधिकारी कुशल जैन यांच्या नेतृत्वाखाली जिल्ह्यातील सर्व विभागांना सोबत घेऊन अभियानाची प्रभावी अंमलबजावणी करण्यासाठी नियोजनबद्ध पावले उचलली जात आहेत.
एकजुटीने नियोजन, समन्वयातून विकास आणि प्रत्येक गावाला समृद्धीच्या दिशेने नेण्याचा ध्यास, या उद्देशाने सुरू झालेली जिल्हास्तरीय आढावा प्रक्रिया सोलापूर जिल्ह्यात मुख्यमंत्री समृद्ध पंचायतराज अभियानाच्या यशस्वी अंमलबजावणीसाठी महत्त्वपूर्ण ठरणार आहे.
0 Comments