पालकमंत्री जयकुमार गोरे यांचे प्रशासनाला स्पष्ट निर्देश; गार्डीच्या पाणीपुरवठ्यासाठी तलावात पाणी सोडण्याचे आदेश
सोलापूर - प्रतिनिधी : राज्य शासनाने सोलापूर जिल्ह्यातील अकराही तालुक्यांत दुष्काळ जाहीर केल्यानंतर पालकमंत्री जयकुमार गोरे यांनी दुष्काळी परिस्थितीचा प्रत्यक्ष आढावा घेण्यासाठी जिल्ह्यातील दुष्काळग्रस्त भागांचा दौरा सुरू केला आहे. सांगोला तालुक्यातील कटफळ येथे भेट देऊन त्यांनी शेतीपिकांच्या नुकसानीची पाहणी केली. यावेळी शेतकऱ्यांशी थेट संवाद साधत त्यांच्या अडचणी जाणून घेतल्या.
दुष्काळग्रस्त शेतकऱ्यांना शासनाकडून सर्वतोपरी मदत केली जाईल, अशी ग्वाही पालकमंत्री गोरे यांनी दिली.
एकही नुकसानग्रस्त शेतकरी पंचनाम्यापासून वंचित राहू नये
दुष्काळामुळे ज्या शेतकऱ्यांच्या पिकांचे नुकसान झाले आहे, त्यांच्या १०० टक्के नुकसानग्रस्त क्षेत्राचे सरसकट पंचनामे करण्याचे स्पष्ट निर्देश पालकमंत्री गोरे यांनी प्रशासनाला दिले. पंचनाम्यांमध्ये नियमित पिकांसह ऊस, फळबागा तसेच अन्य नुकसानग्रस्त पिकांचाही समावेश करावा, अशा सूचना त्यांनी दिल्या.
पंचनामे करताना प्रत्यक्ष शेतातील परिस्थितीची अचूक नोंद घ्यावी. कोणताही नुकसानग्रस्त शेतकरी पंचनाम्यापासून वंचित राहणार नाही, याची प्रशासनाने दक्षता घ्यावी. आपत्तीच्या काळात अधिकाऱ्यांनी संवेदनशीलता आणि जबाबदारीने काम करावे, असेही त्यांनी स्पष्ट केले.
गार्डीच्या पाणीप्रश्नासाठी तलावात पाणी सोडण्याचे आदेश
पंढरपूर तालुक्यातील गार्डी गावाच्या पिण्याच्या पाण्याचा प्रश्न निर्माण होऊ नये, यासाठी पालकमंत्री गोरे यांनी संबंधित अधिकाऱ्यांना महत्त्वाचे निर्देश दिले. गार्डी गावाला कासाळ ओठ्यावरील तलावातून पाणीपुरवठा केला जातो. दुष्काळी परिस्थिती लक्षात घेता संबंधित तलावात पाणी सोडण्यासाठी जलसंपदा विभागाच्या अधीक्षक अभियंत्यांनी आवश्यक कार्यवाही करावी, असे त्यांनी सांगितले.
ग्रामीण भागातील नागरिकांना नियमित पिण्याचे पाणी उपलब्ध राहण्यासाठी प्रशासनाने योग्य नियोजन करून आवश्यक उपाययोजना कराव्यात, असे निर्देशही त्यांनी दिले.
गुरसाळे ग्रामस्थांचे निवेदन स्वीकारले
पंढरपूर तालुक्यातील गुरसाळे येथे पालकमंत्री गोरे यांनी ग्रामस्थांशी संवाद साधला. यावेळी ग्रामस्थांनी विविध मागण्या व स्थानिक समस्या मांडणारे निवेदन त्यांच्याकडे सादर केले. संबंधित विभागांनी ग्रामस्थांच्या प्रश्नांकडे गांभीर्याने लक्ष देऊन आवश्यक कार्यवाही करावी, असे निर्देश पालकमंत्र्यांनी दिले.
शेतकरी मदत आणि पाणीप्रश्नाला प्राधान्य
सोलापूर जिल्ह्यातील दुष्काळी परिस्थितीत पीक नुकसानीचे अचूक मूल्यांकन, शेतकऱ्यांना मदत आणि ग्रामीण भागातील पिण्याच्या पाण्याची उपलब्धता याला शासनाचे प्राधान्य असल्याचे पालकमंत्री गोरे यांनी स्पष्ट केले. सर्व संबंधित विभागांनी समन्वयाने काम करून शेतकरी आणि नागरिकांना आवश्यक मदत वेळेत उपलब्ध करून द्यावी, असे त्यांनी सांगितले.
अधिकारी, लोकप्रतिनिधी व ग्रामस्थांची उपस्थिती
यावेळी आमदार बाबासाहेब देशमुख, माजी आमदार दीपक साळुंखे-पाटील, शहाजी पाटील, प्रशांत परिचारक, जिल्हा परिषदेचे मुख्य कार्यकारी अधिकारी कुशल जैन, अतिरिक्त मुख्य कार्यकारी अधिकारी संदीप कोहिनकर, जिल्हा अधीक्षक कृषी अधिकारी शुक्राचार्य भोसले, प्रांताधिकारी अमित माळी, तहसीलदार बाळूबाई भागवत, तालुका कृषी अधिकारी दीपाली जाधव, गटविकास अधिकारी अमोल जाधव, योगेश कांबळे, पंढरपूरचे प्रांताधिकारी सचिन इथापे, तहसीलदार सचिन लंगुटे यांच्यासह संबंधित विभागांचे अधिकारी, ग्रामस्थ व शेतकरी उपस्थित होते.
@ ठळक संदेश :
“दुष्काळग्रस्त शेतकऱ्यांचा एकही हक्काचा पंचनामा सुटता कामा नये; १०० टक्के नुकसानग्रस्त क्षेत्राची वस्तुस्थितीनुसार नोंद करा.”
0 Comments