श्रीक्षेत्र मार्डीतील घटना; छत्रपती शिवाजी महाराज सर्वोपचार रुग्णालयातील डॉक्टरांच्या प्रयत्नांना यश
सोलापूर प्रतिनिधी - श्रीक्षेत्र मार्डी : शेतातील घरासमोरील वीट बाजूला करताना विटेखाली दबा धरून बसलेल्या नागाने प्राचार्य रविंद्र सदाशिव काशिद यांच्या उजव्या हाताच्या करंगळीला दंश केला. सर्पदंशानंतर त्यांना सोलापूर येथील छत्रपती शिवाजी महाराज सर्वोपचार रुग्णालयात दाखल करण्यात आले. तेथे तब्बल १२१ तास उपचार घेतल्यानंतर शुक्रवारी रात्री त्यांना घरी सोडण्यात आले. त्यांच्या सुखरूप घरवापसीमुळे कुटुंबीयांसह श्रीक्षेत्र मार्डी परिसरातील नागरिकांना मोठा दिलासा मिळाला.
शेतातील घराजवळ घडली घटना
रविवार, दि. ४ रोजी सायंकाळी सातच्या सुमारास श्रीक्षेत्र मार्डी-नरोटेवाडी रस्त्यालगत असलेल्या काशिद मळ्यात ही घटना घडली. मंगळवेढा येथील इंग्लिश स्कूल ज्युनिअर कॉलेजमध्ये प्राचार्य म्हणून कार्यरत असलेले रविंद्र काशिद सुट्टीच्या निमित्ताने शेतातील घरी आले होते. शेतातील सुमारे १५ ते २० गोमातांची काळजी घेत असताना त्यांनी वाटेतील लाल मातीची वीट उजव्या हाताने बाजूला केली. त्याच वेळी विटेखाली असलेल्या नागाने त्यांच्या करंगळीच्या नखाजवळ दंश केला.
कुटुंबीयांना दिली घटनेची माहिती
सर्पदंश झाल्याचे लक्षात येताच काशिद यांनी आपले बंधू जगन्नाथ काशिद आणि पुतण्यांना फोन करून माहिती दिली. कुटुंबीय तातडीने शेतात पोहोचले. रुग्णवाहिकेसाठी १०८ क्रमांकावर संपर्क साधण्याचा प्रयत्न करण्यात आला. मात्र, वेळ न दवडता काशिद यांनी स्वतःच्या चारचाकीने सोलापूर गाठले. कुटुंबीयांनी दुसऱ्या व्यक्तीला वाहन चालवण्याची विनंती केली होती, अशी माहिती नातेवाईकांनी दिली.
सर्वोपचार रुग्णालयात तातडीने उपचार
रविवारी रात्री छत्रपती शिवाजी महाराज सर्वोपचार रुग्णालयात दाखल झाल्यानंतर डॉक्टरांनी सर्पदंशाचे गांभीर्य लक्षात घेऊन तपासण्या आणि उपचार सुरू केले. नातेवाईकांनी साप पिशवीत असल्याची माहिती दिली. त्यामुळे सापाची ओळख पटविण्यास मदत झाल्याचे सांगण्यात आले. त्यानंतर काशिद यांना अतिदक्षता विभागात दाखल करून त्यांच्या प्रकृतीवर सातत्याने लक्ष ठेवण्यात आले.
डॉक्टरांची अहोरात्र धडपड
उपचार सुरू असताना कुटुंबीयांची चिंता वाढली होती. डॉक्टरांचे पथक त्यांच्या प्रकृतीवर लक्ष ठेवून होते. आधुनिक वैद्यकीय उपचारांसोबत कुटुंबीयांनीही त्यांना मानसिक आधार दिला. अनेक तासांच्या उपचारांनंतर त्यांच्या प्रकृतीत सुधारणा झाल्याने नातेवाईकांना दिलासा मिळाला.
१२१ तासांनंतर सुखरूप घरवापसी
रविवारपासून शुक्रवारपर्यंत सुरू असलेल्या उपचारांनंतर, तब्बल १२१ तासांनी शुक्रवारी रात्री साडेदहाच्या सुमारास रविंद्र काशिद यांना रुग्णालयातून घरी सोडण्यात आले. त्यानंतर ते श्रीक्षेत्र मार्डी येथील आपल्या शेतातील घरी परतले.
या संपूर्ण काळात रुग्णालयातील डॉक्टर आणि कर्मचाऱ्यांनी घेतलेली मेहनत, तसेच त्यांचे बंधू जगन्नाथ काशिद, पुतणे रणजित काशिद, प्रशांत काशिद, प्रमोद काशिद, श्रीधर मस्के आणि मित्रपरिवाराने दिलेली साथ महत्त्वाची ठरली.
सर्पदंश झाल्यास तातडीने वैद्यकीय मदत घ्या
या घटनेतून सर्पदंशानंतर तातडीने वैद्यकीय उपचार घेण्याचे महत्त्व अधोरेखित झाले आहे. सर्पदंश झाल्यास घरगुती उपायांवर अवलंबून राहू नये. जखम कापणे, विष शोषण्याचा प्रयत्न करणे किंवा दंश झालेला भाग घट्ट बांधणे टाळावे. रुग्णाची हालचाल कमीत कमी ठेवून त्वरित रुग्णालयात न्यावे.
प्राचार्य रविंद्र काशिद यांच्या सुखरूप घरवापसीमुळे काशिद परिवाराला मोठा दिलासा मिळाला असून, मार्डी परिसरातील नागरिकांनीही समाधान व्यक्त केले.
0 Comments