Advertisement

Responsive Advertisement

सोलापुरात ४८ लाख ४५ हजारांचा गांजा जप्त; दोघांना अटक भारत नगर परिसरात शहर गुन्हे शाखेची धडक कारवाई; ९६.९१ किलो गांजा आणि २५ हजारांचा मोबाईल हस्तगत

सोलापूर - प्रतिनिधी : सोलापूर शहरात अंमली पदार्थांची खरेदी-विक्री करणाऱ्यांविरोधात शहर गुन्हे शाखेने मोठी कारवाई केली आहे. भारत नगर येथील क्रीडा संकुलाजवळील परिसरात छापा टाकून पोलिसांनी तब्बल ९६.९१ किलो गांजा जप्त केला. जप्त गांजाची बाजारभावानुसार किंमत ४८ लाख ४५ हजार ५०० रुपये असून, याप्रकरणी मुजमिल अल्ताफ शेख (वय २०) आणि निलोफर इरफान शेख (वय ३९) या दोघांना अटक करण्यात आली आहे. आरोपींकडून २५ हजार रुपये किमतीचा मोबाईल फोनही जप्त करण्यात आला. या कारवाईमुळे शहरातील अंमली पदार्थांच्या अवैध व्यवहारांविरोधात पोलिसांनी कठोर पाऊल उचलल्याचे स्पष्ट झाले आहे.

गस्तीदरम्यान पोलिसांना आला संशय

सोलापूर शहरात अंमली पदार्थांची खरेदी-विक्री करणाऱ्या व्यक्तींचा शोध घेऊन त्यांच्यावर कठोर कारवाई करण्याचे निर्देश पोलीस आयुक्त एम. राज कुमार यांनी गुन्हे शाखेतील अधिकारी व अंमलदारांना दिले होते. त्यानुसार गुन्हे शाखेचे पथक शहरात गस्त घालून संशयित हालचालींवर लक्ष ठेवत होते.

बुधवार, दि. २८ ऑक्टोबर २०२६ रोजी वरिष्ठ पोलीस निरीक्षक अरविंद माने यांच्या मार्गदर्शनाखाली सहायक पोलीस निरीक्षक शंकर धायगुडे यांच्यासह पोलीस पथक भारत नगर येथील क्रीडा संकुलाच्या भिंतीजवळील परिसरात गस्त घालत होते. यावेळी पथकातील पोलीस अंमलदार भारत पाटील यांना एका घराबाहेर बसलेला इसम प्लास्टिकच्या पिशवीत काही संशयास्पद वस्तू विक्रीसाठी ठेवल्याच्या अवस्थेत दिसला.

पोलिसांना संशय आल्याने पथकाने तत्काळ घटनास्थळी धाव घेत संबंधित इसमाला शिताफीने ताब्यात घेतले. चौकशी केली असता त्याचे नाव मुजमिल अल्ताफ शेख (वय २०), रा. घर क्रमांक ४००, भारत नगर, क्रीडा संकुलाजवळ, कुमठा नाका, सोलापूर असे असल्याचे समोर आले.

घरझडतीत गांजाची ४८ पाकिटे

मुजमिल शेख याच्याकडील प्लास्टिकच्या पिशवीची तपासणी केली असता त्यामध्ये गांजासदृश अंमली पदार्थ आढळून आला. त्यानंतर अमली पदार्थ प्रतिबंधक कायदा अर्थात एनडीपीएस कायद्यानुसार निर्धारित कार्यपद्धतीचे पालन करून त्याची व पिशवीची झडती घेण्यात आली. यावेळी काळसर हिरवट रंगाचा, उग्र वास असलेला, बिया व बोंडांसह ओलसर गांजा मिळून आला.

पोलिसांनी अधिक चौकशी केली असता मुजमिल याने आणखी गांजा घरात असल्याचे सांगितले. त्यानुसार पथकाने संबंधित घराची झडती घेतली. घरामध्ये निलोफर इरफान शेख (वय ३९), रा. घर क्रमांक ४००, भारत नगर, क्रीडा संकुलाजवळ, कुमठा नाका, सोलापूर ही महिला आढळून आली.

घरझडतीदरम्यान प्लास्टिक टेपने गुंडाळलेली गांजाची एकूण ४८ पाकिटे पोलिसांच्या हाती लागली. या कारवाईचे गांभीर्य लक्षात घेऊन सोलापूर शहर पोलीस आयुक्तालयातील फॉरेन्सिक पथकाला घटनास्थळी पाचारण करण्यात आले. मिळालेल्या काळसर हिरवट रंगाच्या, उग्र वासाच्या आणि बिया-बोंडांसह असलेल्या ओलसर पदार्थाची तपासणी करण्यात आली. या तपासणीत तो गांजा हा अंमली पदार्थ असल्याचे निष्पन्न झाले.

४८ लाख ४५ हजार ५०० रुपयांचा मुद्देमाल जप्त

पोलिसांनी केलेल्या मोजमापानुसार जप्त गांजाचे एकूण वजन ९६.९१ किलोग्रॅम भरले. या गांजाची बाजारभावानुसार किंमत ४८ लाख ४५ हजार ५०० रुपये असल्याचे नमूद करण्यात आले आहे. याशिवाय २५ हजार रुपये किमतीचा मोबाईल फोनही जप्त करण्यात आला. अशा प्रकारे मोठ्या प्रमाणात अंमली पदार्थांचा साठा पोलिसांच्या हाती लागला आहे.

या प्रकरणी मुजमिल अल्ताफ शेख आणि निलोफर इरफान शेख यांच्याविरुद्ध सदर बझार पोलीस ठाणे, सोलापूर शहर येथे गुन्हा रजिस्टर क्रमांक ९२९/२०२६ अन्वये एनडीपीएस कायद्याच्या कलम ८(क), २०(ब), २(क) आणि २९ नुसार गुन्हा दाखल करण्यात आला आहे. दोन्ही आरोपींना अटक करण्यात आली असून, प्रकरणाचा पुढील तपास गुन्हे शाखेचे सहायक पोलीस निरीक्षक भरत चंदनशिव करीत आहेत.

वरिष्ठ अधिकाऱ्यांच्या मार्गदर्शनाखाली कारवाई

ही कारवाई पोलीस आयुक्त एम. राज कुमार, पोलीस उपायुक्त डॉ. अश्विनी पाटील (गुन्हे/विशेष शाखा) आणि सहायक पोलीस आयुक्त दिलीप पवार (गुन्हे) यांच्या मार्गदर्शनाखाली करण्यात आली.

या मोहिमेत गुन्हे शाखेचे वरिष्ठ पोलीस निरीक्षक अरविंद माने, नियंत्रण कक्षाच्या पोलीस निरीक्षक शबनम शेख, सहायक पोलीस निरीक्षक शंकर धायगुडे, सहायक पोलीस निरीक्षक तुकाराम घाडगे आणि सहायक पोलीस निरीक्षक भरत चंदनशिव यांच्यासह पोलीस अंमलदार भारत पाटील, शैलेश बुगड, अभिजीत धायगुडे, राजकुमार वाघमारे, काशीनाथ वाघे, महिला पोलीस हवालदार निलोफर तांबोळी, सुमित्रा बारबोले, विजयकुमार वाळके, संजय साळुंखे, सिद्धाराम देशमुख, राजेश मोरे, सुभाष मुंढे, रामा भिंगारे, अजय गुंड, अजिंक्य माने, चालक श्याम सुरवसे आणि बाळासाहेब काळे यांनी सहभाग घेतला.

शहरातील अंमली पदार्थांच्या अवैध खरेदी-विक्रीला आळा घालण्यासाठी पोलिसांकडून शोधमोहीम आणि कारवाई सुरू असून, या प्रकरणातील गांजाचा स्रोत तसेच इतर संभाव्य संबंधांबाबतचा तपास पुढे कोणत्या दिशेने जातो, याकडे लक्ष लागले आहे.

Post a Comment

0 Comments