मंद्रूप, प्रतिनिधी : दक्षिण सोलापूर तालुक्यातील एका शाळेत अल्पवयीन विद्यार्थिनीला मारहाण करून तिचे फोटो सोशल मीडियावर प्रसारित करत बदनामी करण्याची धमकी दिल्याचा प्रकार समोर आला आहे. या प्रकरणी मंद्रूप पोलीस ठाण्यात २३ वर्षीय तरुणाविरुद्ध भारतीय न्याय संहिता आणि पॉक्सो कायद्यांतर्गत गुन्हा दाखल करण्यात आला आहे.
वर्गात जाऊन मारहाण केल्याचा आरोप
पोलिसांनी दिलेल्या माहितीनुसार, १६ ऑक्टोबर २०२६ रोजी सकाळी सुमारे ७.१५ वाजता संबंधित विद्यार्थिनी आपल्या मैत्रिणीसोबत वर्गात बसली होती. त्यावेळी एक तरुण तिच्याजवळ आला. त्याने त्याच्याबद्दल इतरांसमोर वाईट बोलल्याचा जाब विचारत विद्यार्थिनीशी वाद घातला आणि तिच्या पाठीवर हाताने मारहाण केल्याचा आरोप आहे.
तसेच, तिचे फोटो सोशल मीडियावर प्रसारित करून बदनाम करण्याची धमकी दिल्याचे तक्रारीत नमूद करण्यात आले आहे.
पॉक्सो कायद्यानुसार गुन्हा दाखल
या प्रकरणी १७ ऑक्टोबर २०२६ रोजी मंद्रूप पोलीस ठाण्यात भारतीय न्याय संहिता, २०२३ मधील कलम ७८, ११५(२), ३५१(२), ३५१(३) तसेच लैंगिक अपराधांपासून बालकांचे संरक्षण कायदा (पॉक्सो) अंतर्गत कलम १२ अन्वये गुन्हा दाखल करण्यात आला आहे.
या प्रकरणाचा तपास पोलीस उपनिरीक्षक अमितकुमार करपे करीत आहेत. गुन्हा दाखल झाला, त्यावेळी आरोपीला अटक करण्यात आलेली नव्हती. पुढील तपास मंद्रूप पोलीस करीत आहेत.
संपादकीय टीप : अल्पवयीन पीडितेची ओळख सुरक्षित ठेवण्यासाठी तिचे नाव, शाळेचे नाव आणि ओळख पटवू शकतील असे इतर तपशील प्रसिद्ध करण्यात आलेले नाहीत.
0 Comments